SOMAGEDE-Sedulur, kiye ana crita sing mandan mambu gaib, tapine pancen kedadeyan.
Jaman siki sing jare wis canggih, wong padha nganggo komputer, bocah cilik ya
padha nyekeli hape, mbok jenengane wis canggih pisan? Tapine ya jebule esih ana
kedadeyan sing kayane ora mlebung akal, nek denalar ya ora ketemu, tapine
kedadeyan.
Kiye, critane ana wong
sing jenengane Martawanim (70), umaeh neng Desa Plana RT
05 RW 05 Kecamatan Somagede. Pas dina Selasa (28/8) wingenane, dheweke
kuwe lunga sekang umaeh antarane jam sepuluh wengi. Gole pamitan maring bojone
sing jenengane Sati, si Martawanim kiye mung arep metu, kaya kuwe thok.
Sati ya jane Mandan
bingung, depamiti mung kaya kuwe thok, tapine wong wis kadhung lunga, ya dadine
ora teyeng ngomong apa-apa. Nah, deenteni ngasi ngesuke, si Kaki Martanawim
kiye ko ora gadhang bali. Si Sati kiye ya ngasi lapuran maring Kades Plana sing jenengane
Agus Wismono.
Nek ujare Pak Agus,
dheweke ya wis olih lapuran kang Sati, nek bojone kuwe wis sedina pamitan
lunga, tapine ora bali-bali. Malahan, Pak Agus kiye malag wis njajal melu
nggoleti kaki Martanawim kiye maringumaeh sedulur-sedulure, tapne ya ajeg baen
ora ketemu. Tanggane Martawanim ya wis njajal ngubengi kampung, melu nggoleti,
ya padha baen, aliase ora ketemu.
Wis, krasa mandan
maras, tur kayane ko ora mlebung akal, wong daerah kono akhire ya ngarani nek
si kaki Martanawim kiye kayane ilange degondhol Kelong (bangsa lelembut-red). Merga percayane kaya kuwe, akhire
padha njajal nganggo cara sing jere teyeng nggawa bali wong sing ilang
degondhol kelong, wong sekampung padha nggoleti kambi nabuhi grabahan
" Nek jere wong kene, nurut omongane wong tuwa, si Martawanim kiye kayane ilange degawa kelong. Lha nek ana wong
degondhol kelong, gole nggoleti ya nganggo cara kiye, nabuhi grabah, kambi
ngorong-ngorong nyeluki jenengane Martanawim kiye,” ujare Pak Agus, Kades
Plana.
Wis, pokoke, cara kuwe
delakoni, tapine gutul jam rolas mbengi dina Rebone, si Martanawaim kiye ora
gadhang ketemu. Akhire, wong kampung kono nyeluk wong pinter kanggo ngreangi
nggoleti Martanawim kiye. Barang wis kaya kuwe, kira-kirane jam setengah siji
wengi dina Rebo
(29/8), kaki Martanawim kiye malah
ketemu neng pipir kali Serayu neng ndhuwur klari, lan pas detemokaken, lagi
semaput.
Merga semaput kuwe,
kakiMartanawim kiye akhire degawa maring puskesmas kanggo depriksa, kenangapa lan apa sing
kedadeyan. Tapine, ngasi siki si kaki Martanawim kiye ya esih linglung, jan ora
kemutan apa sing kedadeyan maring dheweke.
Kuwe sedulur, jebule
jaman siki sing jere wis canggih ya esih baen ana kedadeyan sing ora mlebung
akal kaya kedadeyan sing dealami neng kaki Martanawim kiye. Mulane, sing akeh
ngibadah, aja padha cokan kelalen ninggalaken sembayang, kon adoh sekang
kedadeyan kaya kuwe, lan lelelmbut dadi padha ngadoh. Jerene sih lelembut padha
ora doyan maring wong sing kentheng ngibadaeh, bener ora sedulur? (eww)
No comments:
Post a Comment