PURWOKERTO-Sedulur, esih kemutan critane
maling sing apen-apen piru sing
wektu kuwe nyolong gelang,kalung lan
ali-aline pak Wahyu kira-kira rong
minggu kepungkur?
Lha, critane, si maling piru kuwe
wingenane pas dina Kemis (9/5) akhire
teyeng dedhimek pas agi arep nyolong
maning, akhire siki kuwe maling piru
kudu mlebung bui nang Polsek Purwokerto
Selatan. Kepengen ngerti critane?
Ngeneh, tak critani sedulur.
Dadi critane kaya kiye, dina kuwe,
awan-awan antarane jam setengah rolasan
lah, mangsane wong padha laut kambi
ngaso nang umah. Kedadyeane ning umaeh
Pak Agus Haryono (47) nang Jalan Sultan
Agung 129 Kelurahan Teluk
Kecamatan Purwokerto Selatan.
Pas kuwe, Pak Agus agi lunga, dadi sing
ana mung Bu Agus sing agi pijet
nang kamar karo anake, pembantune, lan
karyawan sing padha ngode ning
kantor sing ana nang njero umah kuwe.
Embuh sekang endi tekane, ijig-ijig
si maling piru kiye wis ana ning njero
ngumah, marakaken si Bu Agus sing
agi bangeting kepenak depijet njenggirat
kaget.
Barang demataken, Bu Agus kuwe paham nek
wong kuwe ganu wis tau mlebung
umaeh. Si Bu Agus kiye banjur kongkonan
tukang pijete mlayu maring umaeh
Pak Warsono (43), sing dadi RT nang kono
nglapuraken nek ana maling
mlebung umaeh.
Dasini (48), pembantune Bu Agus, sing
agi nggawe es teh nggo anake Bu Agus
krungu Ibune ngorong-ngorong nyeluki
dheweke, banjur marani. Weruh nang
njero umah ana wong wadon sing nyalawadi
kuwe, banjur dheweke nyeluki wong
kantor sing gageyan metu lan nggrudug
ming umaeh Bu Agus kuwe.
Pak RT, sing deceluki nang tukang pijet
ya cepet-cepet ngundangi warga
nggo nggerebeg ming ngonoh. Lha, ngepasi
pisan pas kuwe, PAk Agus nembe
bae bali. Pas arep markir mobil ning
latar, dheweke weruh ana montor Mio
abang sing plat nomere R 6736 HF gole
parkir nang latar ko maen temen,
ngalang-alangi mobile.
Tapi mbarang dedeleng, kayane Pak Agus
kuwe paham nek montor kuwe montore
maling sing ndhisit tau ming umaeh, tapi
ora kecekel, banjur mobil sengaja
depalangaken ning nburine montor supaya
montore ora teyeng detokaken.
Warga sing teka bareng Pak RT banjur
langsung nggembosi montore si maling
piru kuwe, terus nggrebeg maring njero
ngumah.
Lha, rupane si maling kiye ora ngerti,
nek dheweke wis degrebeg, mbarang
weruh ana wong akeh, dheweke niat mlayu
metung lawang, tapi wis kadung
depalangi ning wong kantor. Ora teyeng
obah maning, akhire kontak montor,
helm karo hape ne dejikot ning warga,
terus degawa ming Polsek Purwokerto
Selatan.
Kanit Reskrim Polsek Purwokerto Selatan,
AKP Gatot Heriyanto, pas nang
kantore ngomong, nek maling piru kuwe
bangeting angel dekongkon
crita,malah muncu-muncu bae. Tapi sekang
tato sing ana ning lengen kiwane,
keton nek jenengane Ela, soale ana tato
sing tulisane Soni-Ela. Lha Soni
kuwe kayane ya bojone mbok.
Sekang maling piru kiye,
pulisi nahan dompete sing isine duit ngasi sejuta
satus, karo hape sing
degawa. Nek jarene Pak Gatot, si maling piru kiye
bakal dejiret nganggo
Pasal 363 ayat (1) KUHP sing ngurusi soal colong
jukut. Siki si maling
piru kuwe agi degawa ming Cilongok kanggo nidokaken
barang-barang kasil
colongane ming pulisi. (eww)
No comments:
Post a Comment